Cambian de idioma, non de amo.
Unha mesma dereita en catro siglas.
Non hai ningunha diferenza de fondo entre o PP, Vox, Junts per Catalunya ou Aliança Catalana. O único que os distingue é o idioma no que defenden os intereses dos multimillonarios, dos especuladores e dos fondos voitre. O demais é folclore: bandeiras distintas para un mesmo negocio.
A lei de vivenda e a votación de sempre.
Veremos unha vez máis o PP, Vox e Junts votar xuntos, porque, no esencial, son o mesmo. Votarán contra unha lei de vivenda que busca protexer a clase traballadora dos fondos voitre e de quen converte un dereito constitucional, o dunha vivenda digna, nunha máquina de gañar millóns espremendo o pobo.
Que ninguén o esqueza cando chegue a hora das bágoas de crocodilo: estes son os que rexeitan que existan leis que defendan os inquilinos. Os mesmos que amparan fondos sen alma, capaces de subirlle o aluguer un 200 % dun día para outro a unha persoa de case noventa anos, a un enfermo, a unha persoa con discapacidade ou a quen sexa, co único obxectivo de botala da súa casa e especular con ese piso ou con ese terreo urbanizable.
A dereita xa é ultradereita.
A dereita de hoxe é ultradereita. Defende o dereito do máis forte a abusar do máis débil: a lei da selva contra o pobo e ao servizo do poder. É unha involución social que pretende arrasar ata o último sinal de humanidade e empatía. Son os cans fieis das oligarquías e dos poderes económicos, do sionismo de extrema dereita que perpetra o xenocidio en Gaza e de quen o apoia e o financia, do trumpismo e de todo o peor que hai agora mesmo no mundo.
Xustiza para os voitres.
Non hai xustiza para a clase traballadora. A xustiza está feita para os carroñeiros económicos e sociais, non para os pobos. O que chaman xustiza é abuso legalizado: leis e sentenzas ao servizo dos poderosos para blindar os seus intereses. Isto é unha democracia burguesa posta a traballar para os fondos voitre, as grandes multinacionais e os bancos, para quen vive chuchándolles o sangue aos máis febles.
Sen máis patria ca a conta corrente.
Agora Junts confirma que votará cos seus iguais, co PP e Vox. Porque, por riba de calquera patria, bandeira, cultura ou idioma, están os intereses de quen move os fíos. Por riba dos pobos está o diñeiro. Por iso non sorprende que toda a ultradereita vote unida contra calquera medida que non sirva para converter as nosas vidas no seu negocio.
Nisto de defender os poderosos non hai nacionalismo que valla. Quen non ten máis patria ca o seu peto non precisa dunha lingua propia para pisar os máis febles: tanto ten que as leis se escriban en castelán, en catalán, en galego, en éuscaro, en inglés, en francés, en alemán ou en portugués. Tanto ten en que idioma se minta e se difundan bulos para seguir abusando de quen vai quedar na rúa en situacións dantescas. A infamia soa igual en todas as linguas.
E fronte a eles, organización, sindicato, barrio e rúa. Porque a vivenda non se defende con discursos: deféndese coa forza da clase traballadora unida.
Até a vitoria sempre!
André Abeledo Fernández
