Feijóo non gañou ningún debate: mentir, enlamar e deshumanizar é todo o que ten.

Publicado:

Noticias populares

Feijóo non gañou ningún debate: mentir, enlamar e deshumanizar é todo o que ten.

Para alguén como Feijóo, e para a ultradereita en xeral, nun debate vale todo. Os datos invéntanse, as mentiras sóltanse sen pestanexar, a educación sobra e non deixar falar o contrario é o normal. Iso é debater para esta xente: o mesmo que fai un borracho nunha taberna, que non escoita, berra máis forte e cre que ten razón porque o outro calou.

Gañar é mentir?

Despois de cada cita deste tipo aparece o coro de sempre preguntando se Feijóo gañou. E eu pregúntome que clase de vitoria é esa. Mentir, dar datos falsos, ser maleducado, interromper e non cumprir as normas pactadas… Parece que para algúns iso é gañar. Se gañar consiste en saltar as regras, entón tamén gaña quen fai trampas ao tute e queda co bote. Pero non, iso non é gañar: iso é non ter vergoña.

Un debate é un intercambio de argumentos, datos e propostas ante a cidadanía. Quen mente, interrompe e atropela o seu adversario non debate: foxe do debate, porque sabe que, con argumentos e coa verdade por diante, non ten nada que ofrecerlle á clase traballadora.

O porco no seu lamedo

Feijóo é como os porcos: séntese cómodo chafurdando na lama. O seu é xogar sucio, enlamar o de enfronte para que todo o escenario quede perdido e ninguén saiba xa quen di a verdade. É un político de esterqueira e na esterqueira móvese coma na casa. Canto máis baixo é o nivel, máis a gusto está; canto máis limpo é o debate, máis se lle notan as carencias.

A dor allea como munición

E cando non queda máis lama, tira da dor dos demais. O uso e a deshumanización das vítimas de accidentes e catástrofes, dos migrantes ou da familia do contrincante é o único que alguén como Feijóo ten para ofrecer. Unha traxedia non é para el un motivo para axudar as familias, senón unha oportunidade para rendibilizala: as vítimas serven de arma arroxadiza contra o Goberno e, cando deixan de servir, esquécense.

Cos migrantes, o mesmo. Xente que foxe da guerra, da fame, da miseria e das ditaduras é presentada como unha ameaza ou un problema de seguridade. Deshumanizar o máis débil é a vella receita da dereita e da ultradereita para que os de abaixo se pelexen entre si mentres os de arriba seguen cobrando e mandando. E cando se lles acaban os argumentos, que é sempre, tiran da familia do adversario, porque quen precisa meterse coa muller ou cos fillos do outro non ten nada que dicir sobre o traballo, a vivenda, as pensións ou a sanidade.

Sen empatía, sen honestidade e sen dignidade

O seu proxecto baséase no peor do ser humano e nunha absoluta falta de empatía, honestidade e dignidade. Non é un accidente nin unha mala noite: é un método. E é o método de todo o seu partido. O PP sempre se salta o pactado e fai trampas; non coñece a honestidade. Cando acorda unhas regras é para incumprilas; cando asina un pacto é para rompelo, e despois vai de vítima. Son uns auténticos senvergoñas, do primeiro ao derradeiro, e convén dicilo sen rodeos, porque a educación que eles non teñen non nos pode servir de escusa para calar o evidente.

Quen trata así as vítimas, os migrantes e as familias dos demais non nos vai tratar mellor aos traballadores e ás traballadoras cando lle toque recortar os nosos dereitos.

O meu voto está decidido: xamais serei un fachapobre

Eu téñoo claro e o meu voto está decidido. Xamais serei un fachapobre: ese traballador que vota a quen o despreza, lle recorta os dereitos, o despide barato e o manda traballar enfermo mentres aplaude a quen o insulta desde un atril. Non me engano: a democracia burguesa non é a solución, e os que militamos na esquerda de clase sabémolo mellor ca ninguén. Pero que non sexa a solución non quere dicir que dea igual quen goberne. A ultradereita é o desastre, un suicidio para os traballadores e as traballadoras: a sanidade, as pensións, os salarios e os dereitos laborais pagan sempre a factura.

Primeiro hai que frear o fascismo e os que lle abren a porta; despois, organizarse e construír a alternativa que esta clase traballadora merece. Pero que ninguén espere que dea por gañador a quen fai trampas, mente e berra. Nin nun debate, nin nas urnas, nin na vida.

 

Até a vitoria sempre!

 

André Abeledo Fernández

DEJA UN COMENTARIO (si eres fascista, oportunista, revisionista, liberal, maleducado, trol o extraterrestre, no pierdas tiempo; tu mensaje no se publicará)

Por favor ingrese su comentario!
Por favor ingrese su nombre aquí

Este sitio usa Akismet para reducir el spam. Aprende cómo se procesan los datos de tus comentarios.

Últimas noticias

Feijóo no ganó ningún debate: mentir, embarrar y deshumanizar es todo lo que tiene.

Feijóo no ganó ningún debate: mentir, embarrar y deshumanizar es todo lo que tiene. Para alguien como Feijóo, y para...

Le puede interesar: