Votar coa cabeza, non coas tripas
Camaradas,
Debemos votar en masa para defender os nosos intereses e os nosos dereitos como clase traballadora. Votar por odio é estúpido e, neste caso, é como xogar á ruleta rusa co cargador da pistola cheo.
Queren que votemos coas tripas.
As oligarquías queren que votemos guiados polo odio, o medo, a frustración e os prexuízos, sen usar o cerebro. Así gaña a dereita: necesita prexuízos, mentiras e ignorancia. Eles representan os intereses duns poucos apelidos e, por iso, precisan mentirlle ás masas. Se non, non gañarían nunca.
Frear a involución social.
Debemos votar para frear a involución social que nos vai levar á Idade Media en canto a dereitos e liberdades. A ultradereita quere a demolición dos poucos dereitos que nos quedan, e a nosa tarefa é parala.
O voto ao partido do amo.
Algúns pensan que votar polo partido do amo os fai menos escravos, pero só os fai escravos máis arrastrados. Agardar máis sobras por ser máis obedientes non adoita funcionar. Renunciar á dignidade non é o camiño: coa dignidade non se come, pero un pobo sen dignidade remata por non comer.
Votar para parar o desastre.
Vota polo menos malo, por quen defenda un pouco máis os teus intereses. Pero, sobre todo, debemos votar para parar a ultradereita e o desastre que suporía darlles o poder a quen tanto nos desprezan.
Até a vitoria sempre!
André Abeledo Fernández
