O señor das paguiñas tamén cobra o bono térmico: a vergonza de Abascal
Unha noticia que non sorprende, pero indigna.
Santiago Abascal, o home que leva anos sinalando a quen cobra «paguiñas», foi pillado na súa propia casa coa man na axuda. Segundo revelou en exclusiva «infoLibre» (https://www.infolibre.es/politica/pareja-abascal-cobra-bono-social-calefaccion-familias-vulnerables_1_2240283.html) o pasado 16 de novembro, a súa muller, Lidia Bedman, recibiu 210,71 euros do bono social térmico, a axuda pública pensada para que as familias vulnerables poidan pagar a calefacción e a auga quente. Concedeuna a Comunidade de Madrid en maio e corresponde ao exercicio de 2025. Deronlla por ter recoñecido o título de familia numerosa, unha condición que permite acceder ao bono eléctrico e, a través del, ao térmico, sen límite de renda.
Sexamos honestos, como sempre: non consta ningunha irregularidade. É legal. E precisamente por iso a noticia é tan reveladora.
O señor das paguiñas, dos chiringuitos e agora do bono térmico.
Abascal construíu a súa carreira política denunciando as axudas a quen as necesita. As «paguiñas» para os pobres, os «chiringuitos» para os demais. Pero cando se trata da súa casa, a axuda pública si é benvida. E non estamos a falar dunha familia que non chega a fin de mes. Falamos dun político que cobra pola súa acta de deputado e polo seu cargo, e que preside unha fundación como Disenso. De verdade lle fai falta ese diñeiro? É tan mesquiño, tan rapiñador, que non pode deixar pasar nin 210 euros destinados á xente que pasa frío?.
Legal non é o mesmo que decente.
Que sexa ou non delito é o de menos. O bono térmico concédese de forma automática a quen xa ten o bono eléctrico, pero pódese renunciar a el. Ninguén obriga a ninguén a conservalo. Quen dispón dunha posición de poder e de bonanza económica e, aínda así, acepta unha axuda concibida para combater a pobreza enerxética fai algo inmoral. E quen, ademais, se pasa media vida predicando contra as axudas sociais é, simplemente, un hipócrita.
Non está só, e iso tamén hai que dicilo.
O caso de Abascal non é o primeiro. infoLibre lembra que xa cobraban esta axuda Enrique Ossorio e Alfonso Serrano, da cúpula do PP de Madrid, así como Ricardo Chamorro, deputado de Vox e portavoz de Enerxía do seu partido. Ossorio e Serrano, de feito, volveron percibila na primavera de 2026. E aquí convén sinalar tamén ao Goberno: prometeu pechar este baleiro legal establecendo requisitos de renda para as familias numerosas e segue sen facelo. Promesas da socialdemocracia, xa sabemos: moito anuncio e pouca decisión cando toca tocar o peto dos privilexiados.
Mentres tanto, as familias de verdade.
Mentres eles cobran sen necesitalo, as familias que realmente non chegan a fin de mes estrélanse contra a burocracia, os requisitos e os prazos para acceder a estas axudas. Esa é a verdadeira vara de medir: a quen as necesita póñenlle atrancos, mentres que quen non as necesita as recibe sen pestanexar.
Isto non vai de 210 euros. Vai da cara dura de quen predica austeridade para os demais e se serve a si mesmo. Vai de lembrar, unha vez máis, que a ultradereita é a defensora dos privilexios, non dos de abaixo.
Que vergonza!
Até a vitoria sempre!
André Abeledo Fernández
Fonte: infoLibre, «La pareja de Abascal cobra el bono social de calefacción para familias vulnerables» (16 de novembro de 2026): https://www.infolibre.es/politica/pareja-abascal-cobra-bono-social-calefaccion-familias-vulnerables_1_2240283.html

