VOX e o desprezo a Galiza. NON PASARÁN.
VOX e o desprezo ao noso idioma.
VOX despreza o galego, o noso idioma; para eles, é un dialecto de paletos. Despreza a nosa cultura e nega a nosa historia. E logo faise o sorprendido de que na Galiza non sexa benvido. Non queremos o inimigo na nosa casa cuspindo o seu odio e as súas mentiras. Falan de liberdade de expresión, pero referíndose á liberdade que pretenden ter para mentir e para faltarlle ao respecto ao pobo galego, á razón galega, á Galiza.
Reis antes que leis.
Por moito que o neguen e tenten borrar a nosa historia, «Tivo Galiza reis antes que Castela leis». O Reino de Galiza tivo a súa orixe no século V co Reino Suevo, fundado cara ao ano 410, sendo un dos primeiros reinos medievais de Europa occidental. Pola contra, o Condado de Castela naceu moito despois, nos séculos IX-X, e non se constituíu como reino independente de pleno dereito ata o século XI, con Fernando I.
A frase popular emerxeu na tradición oral para lembrar a solera histórica, a autonomía institucional e a primacía política da Galiza e do ámbito galaico-leonés fronte ao posterior hexemonismo político e xurídico da Coroa de Castela. Cando Castela aínda era un territorio sen leis propias, un simple condado dependente, Galiza xa contaba con estruturas de goberno regias e soberanía propia. Ata o propio Afonso X o Sabio escribiu en galego a súa obra poética, as Cantigas de Santa María, máis de catrocentas cancións dedicadas á Virxe. O rei de Castela empregou o galego-portugués porque era o idioma prestixioso da península para a poesía naquel momento.
O idioma da clase traballadora.
O noso idioma continúa en perigo por acción e por omisión dun goberno da Xunta que o menospreza, en vez de defendelo como o tesouro que é, como parte irrenunciable da identidade do pobo galego. O galego foi sempre o idioma da clase traballadora, o idioma do campesiñado, da casa do humilde, o idioma do pobo, non dos señoritos.
O goberno do PP, tanto na Galiza coma en Madrid, viu sempre o feito identitario de ter un idioma propio na Galiza, como en Catalunya ou Euskadi, coma un perigo para a sacrosanta unidade do Estado español, coma unha agresión ao españolismo rancio que representaban. Pero agora, co novo goberno do PSOE, tamén estou preocupado ao ver que o flamante ministro do Interior, un xuíz, Fernando Grande-Marlaska, se atreveu, na súa etapa na xudicatura, a tratar o galego de dialecto e a menosprezalo como idioma.
Un tesouro, non unha ameaza.
Non hai idiomas de primeira e de segunda categoría. Todos os idiomas do mundo deberían ser declarados patrimonio da humanidade, porque son moito máis ca un xeito de comunicarse: son o froito da evolución dos pobos, son séculos de construción dunha comunidade lingüística. O feito de que no Estado español convivan catro idiomas, o castelán, o catalán, o éuscaro e o galego, debería verse coma un tesouro, coma unha posibilidade de enriquecemento mutuo.
A Galiza é unha nación e un pobo cunha identidade de seu. Temos unha cultura, unha historia e un idioma propios, e estas características fannos galegos. O noso idioma forma parte fundamental da nosa identidade, foi sempre o idioma da clase traballadora galega, foi lingua de resistencia e continúa resistindo en condicións moi difíciles.
Cando o desprezo é tamén negocio.
O peche dos centros de atención á clientela na Galiza, para centralizar este servizo en terceiros países, busca que estas empresas consigan maiores beneficios mentres se destrúe emprego na nosa terra. Pero isto é, ademais, un insulto a todo un pobo, un menosprezo inaceptable ao noso idioma, un xeito de pisar a nosa dignidade. Alguén pode imaxinar que estas empresas fagan o mesmo en Cataluña? Verdade que non? Pois as galegas e os galegos debemos facer valer o noso dereito a ser atendidos no noso idioma na nosa terra. Debemos esixir respecto.
Santiago dille NON PASARÁN.
E a proba de que este pobo aínda ten dignidade acabámola de ver en Santiago de Compostela. O boicot cidadán impediu a celebración do acto de VOX programado para o luns 21 de setembro no centro sociocultural de Santa Marta. Centos de manifestantes botáronse á rúa e o evento tivo que ser suspendido. Non lles imos deixar espazo. Cada vez que tenten vir cuspir o seu odio á Galiza, ímolos atopar de fronte, organizados, na rúa. Na Galiza aínda queda dignidade.
O PPVOX, o fascismo imperialista español, xamais poderá borrar a nosa historia. Non poderá borrar o que somos, porque sempre seremos galegos.
Até a vitoria sempre!
André Abeledo Fernández
