Mercadona e a represión sindical: o prezo invisible do «modelo de éxito.
Por André Abeledo Fernández (Militante comunista e sindicalista galego).
Mercadona ocupa portadas constantes polas súas cifras récord de facturación e un suposto modelo idílico de relacións laborais. Repítennos ata a saciedade que é unha empresa modélica, o orgullo do capitalismo patrio. Pero la realidade que se vive dentro das súas tendas e bloques loxísticos dista moito dos publirreportaxes pagados. Detrás dos uniformes pulcros e da aparente paz social agóndese unha das maquinarias de control e represión sindical máis sutiles e eficaces do noso país.
O chamado «Modelo de Calidade Total» de Juan Roig non é máis ca un sistema de control social absoluto.
En Mercadona, a disidencia laboral págase cara. A estratexia da dirección pasa por impor un sindicalismo de concertación dócil e domesticado, cómodo para os intereses da empresa. As siglas sindicais maioritarias operan a miúdo como meras extensións da dirección de recursos humanos, validando convenios colectivos que perpetúan a precariedade e a máxima flexibilidade horaria a costa da conciliación dos cadros de persoal.
A verdadeira represión comeza cando as traballadoras e traballadores deciden organizarse de maneira independente e combativa. Quen dan o paso de crear seccións sindicais que cuestionan as ordes, esixen o cumprimento estricto da prevención de riscos ou denuncian as altas médicas forzadas, entran de inmediato na lista negra. A persecución laboral non se fai esperar: cambios arbitrarios de horarios, illamento, sancións disciplinarias preventivas e campañas de desprestixio entre os propios compañeiros destinadas a sementar o medo.
O peso dos tribunais: a realidade xudicial fronte ao relato oficial
Lonxe de seren acusacións infundadas, os abusos da multinacional están quedando acreditados de forma sistemática nos xulgados. As resolucións contra a mercantil por esmagar os dereitos fundamentais do seu persoal acumúlanse cunha contundencia demoledora:
Castigo económico á afiliación: Un xulgado do Social de Ourense volveu condenar á empresa tras demostrarse que retirou de forma arbitraria e discriminatoria a prima de beneficios de 5.000 euros a unha traballadora afiliada á Confederación Intersindical Galega (CIG). O fallo obriga a abonar dita contía máis outros 30.000 euros de indemnización por vulnerar os seus dereitos fundamentais. Esta práctica mafiosa de usar o plus por obxectivos para golpear o peto dos representantes sindicais e de quen sofren unha incapacidade ou redución de xornada foi declarada ilegal por máis de dez sentenzas impulsadas por sindicatos como ELA.
Vulneración sistemática da liberdade sindical: O Tribunal Superior de Xustiza de Galicia (TSXG) ratificou unha dura condena que impón 22.503 euros de sanción por danos morais a Mercadona tras declarar a nulidade radical de tres condutas antisindicais directas contra a representación dos traballadores.
Despedimentos como represalia: O Tribunal Superior de Xustiza de Castela e León revogou un fallo de primeira instancia para declarar nulo o despedimento dunha empregada en baixa por ansiedade. O alto tribunal sentenciou que o despedimento foi unha represalia directa e ilegal tras as reclamacións xudiciais da traballadora en materia de prevención de riscos laborais, vulnerando de cheo a súa garantía de indemnidade.
O despedimento disciplinario e a asfixia económica son as armas definitivas da empresa para descabezar calquera intento de resistencia colectiva.
Fabrícanse acusacións de baixo rendemento ou faltas graves inexistentes para xustificar a expulsión de delegados incómodos. A mensaxe enviada ao resto do persoal é nítida: organizarse á marxe das canles oficiais da empresa significa o despedimento inmediato. Imponse así a lei do silencio a través do terror psicolóxico e a ameaza económica.
Non podemos seguir tolerando que os beneficios milmillonarios dunha grande multinacional se levanten sobre a aniquilación dos dereitos fundamentais da clase traballadora. A liberdade sindical non é un privilexio negociable, é un dereito conquistado con sangue e suor que debe respectarse tamén dentro dos supermercados de Mercadona. É hora de romper o medo, solidarizarnos cos represaliados e construír un sindicalismo de clase, de base e combativo que poña freo ao absolutismo da patronal.
André Abeledo Fernández
